ធនាគារ ប្រ៊ីដ បានប្រកាសជាផ្លូវការនូវកិច្ចសហប្រតិបត្តិការ ជាមួយនឹងក្រុមហ៊ុន ដាប់ប៊ែលយូប៊ី ស្ព័តវីលេច ដើម្បីផ្ដល់ជូននូវកញ្ចប់ឥណទានគេហដ្ឋានពិសេស នៅលើគម្រោង ភូមិកីឡដ្ឋាន វើលដ៏ប្រ៊ីដ ដែលរួមមានទាំងគម្រោងគេហដ្ឋាន និងគម្រោងខុនដូ ដល់អតិថិជន។

កិច្ចសហប្រតិបត្តិការនេះ នឹងជួយទៅដល់អតិថិជនអោយក្លាយជាម្ចាស់គេហដ្ឋាន ឬខុនដូ ក្នុងក្ដីប្រាថ្នារបស់ពួកគេ នៃគម្រោងភូមិកីឡដ្ឋាន វើលដ៏ប្រ៊ីដ ជាមួយនឹងទំហំឥណទានដល់ទៅ ៩០% រហូតដល់ ២៥ ឆ្នាំ ជាមួយនឹងអត្រាការប្រាក់ ប្រកួតប្រជែង ព្រមទាំងការអនុម័តឥណទានឆាប់រហ័សផងដែរ។

Dr. Simon Vancliff ប្រធាននាយកប្រតិបត្តិនៃគម្រោងភូមិកីឡដ្ឋាន វើលដ៏ប្រ៊ីដក៏មានប្រសាសន៍ដែរថា៖ “យើងពិតជាមានកិត្តិយសណាស់ក្នុងការធ្វើកិច្ចសហប្រតិបត្តិការជាមួយធនាគារ ប្រ៊ីដ ដែលនឹងផ្តល់ជាឥណទានសម្រាប់ជួយសម្រួលដល់លទ្ធភាពហិរញ្ញវត្ថុរបស់អតិថិជនយើងបន្ថែមទៀតក្នុងការទទួលបានលំនៅដ្ឋានក្នុង ភូមិកីឡដ្ឋាន វើលដ៏ប្រ៊ីដ” ។

ស្ថិតនៅតាមបណ្ដោយផ្លូវជាតិលេខ ៦ គម្រោងភូមិកីឡដ្ឋាន វើលដ៏ប្រ៊ីដ មានទីតាំងស្ថិតនៅជាប់ពហុកីឡដ្ឋានជាតិមតរតកតេជា ដែលនឹងធ្វើជាម្ចាស់ផ្ទះប្រារព្ធព្រឹត្តិការណ៍សំខាន់ៗ នៃកម្មវិធីស៊ីហ្គេមលើកទី ២៣ នៅឆ្នាំ ២០២៣ ហើយទីតាំងភូមិសាស្រ្តភាគខាងជើងនៃរាជធានីភ្នំពេញ គឺជាទីតាំងតែមួយគត់បានមកការរួមបញ្ចូលគ្នានៃលំនៅឋានប្រណីតបែបស៊ីវីល័យ ស្តង់ដារនៃការរស់នៅខ្ពស់ ស្ថាបត្យកម្មទំនើប តម្លៃសមរម្យរួមជាមួយនឹងបរិយាកាសស្រស់ស្រាយប្រកបដោយផាសុកភាព ព្រមទាំងផ្តល់សុខុមាលភាពខ្ពស់សម្រាប់អតិថិជនផងដែរ។ គម្រោងភូមិកីឡដ្ឋាន វើលដ៏ប្រ៊ីដ រួមមាន ខុនដូ១២អាគារ ស្មើនឹង ១៣១៩បន្ទប់ អមជាមួយនឹង ផ្ទះល្វែង ផ្ទះអាជីវកម្ម វីឡាភ្លោះ ផ្សារទំនើប សារមន្ទីរកីឡា មានចំណតធំទូលាយ ល្អឥតខ្ចោះសម្រាប់ការរស់នៅ និងវិនិយោគនាពេលអនាគត។

គួរបញ្ជាក់ផងដែរថា ក្រុមហ៊ុន ដាប់ប៊ែលយូប៊ី ស្ព័តវីលេច ជាបុត្រសម្ព័ន្ឋក្រុមហ៊ុន វើលដ៏ប្រ៊ីដគ្រុប ដែលជាអ្នកអភិវឌ្ឍ និង ជាក្រុមហ៊ុនសាងសង់លំនៅដ្ឋាន ដ៏មានកេរ្តិ៍ឈ្មោះបោះសម្លេងល្បីល្បាញនៅក្នុងវិស័យអចលនទ្រព្យកម្ពុជា ជាង៣០ឆ្នាំកន្លងមកហើយ ដោយស្ថិតក្រោមការគ្រប់គ្រងផ្ទាល់របស់ អ្នកឧកញ៉ា សៀ ឫទ្ធី ដែលជាស្ថាបនិក និងប្រធានក្រុមប្រឹក្សាភិបាល នៃ ក្រុមហ៊ុន វើលដ៏ប្រ៊ីដគ្រុប។

Mr. Richard Liew ប្រធាននាយកប្រតិបត្តិនៃធនាគារ ប្រ៊ីដ មានប្រសាសន៍អោយដឹងផងដែរថា៖ “យើងមានក្ដីសោមនស្ស រីករាយ ក្នុងឱកាសចុះអនុស្សារណៈនៃការយោគយល់ លើកដំបូងបង្អស់របស់ធនាគារ ជាមួយនឹងគម្រោងភូមិកីឡដ្ឋាន វើលដ៏ប្រ៊ីដ ហើយយើងមានសុទិដ្ឋិនិយម ក្នុងការមើលឃើញភាពរីកចម្រើននៃការវិនិយោគប្រកបដោយផ្លែផ្កា សម្រាប់ភាគី ទាំងពីរ ក៏ដូចជាអតិថិជនរបស់យើងផងដែរ។”

នៅដើមឆ្នាំ ២០២២ ធនាគារ ប្រ៊ីដ បានទទួលអាជ្ញាប័ណ្ណធនាគារពាណិជ្ជ ប្រកបដោយជោគជ័យ ពីធនាគារជាតិនៃកម្ពុជា។

អំពីធនាគារ ប្រ៊ីដ

ធនាគារ ប៊្រីដ ជាបុត្រសម្ព័ន្ធក្រុមហ៊ុន វើលដ៏ប្រ៊ីដ គ្រុប បានទទួលបានអាជ្ញាប័ណ្ណធនាគារពាណិជ្ជ ពីធនាគារជាតិនៃកម្ពុជា នៅក្នុងឆ្នាំ ២០២២។ ជាមួយនឹងការចាប់ផ្ដើមប្រតិបត្តិការដំបូងនៅឆ្នាំ ២០១៤ ធនាគារ ប៊្រីដ ត្រូវបានស្គាល់ថាជា ធនាគារឯកទេស Oxley WorldBridge មុនពេលផ្លាស់ប្ដូរឈ្មោះទៅជា ធនាគារឯកទេស ប្រ៊ីដ នៅឆ្នាំ ២០២១។ ធនាគារ ប្រ៊ីដ មានគោលបំណងផ្ដល់ជូនអតិថិជននូវ ផលិតផល និងសេវាធនាគារជាច្រើន ដែលរួមមាន សេវាធនាគារបុគ្គល (Personal Banking) សេវាធនាគារអាជីវកម្ម (Business Banking) សេវាធនាគារព្រីមៀរ (Premier Banking) និងសេវាធនាគារឌីជីថល (Digital Banking) នាពេលឆាប់ៗខាងមុខនេះ។

អំពីដាប់ប៊ែលយូប៊ី ស្ព័ត វីលេច

ក្រុមហ៊ុន ដាប់ប៊ែលយូប៊ី ស្ព័ត វីលេច ឯ.ក  ដែលជាបុត្រសម្ព័ន្ឋក្រុមហ៊ុន វើលដ៏ប្រ៊ីដគ្រុប ដែលជាអ្នកអភិវឌ្ឍ និង ជាក្រុមហ៊ុនសាងសង់លំនៅដ្ឋានដែលមានកេរ្តិ៍ឈ្មោះបោះសម្លេងល្បីល្បាញក្នុងវិស័យអចលនទ្រព្យជាង៣០ឆ្នាំមកហើយ។ ដោយស្ថិតនៅក្នុងតំបន់ ពាណិជ្ជកម្ម “ភូមិកីឡដ្ឋាន វើលដ៍ប្រ៊ីដ” ត្រូវបានសិក្សាយ៉ាងល្អិតល្អន់ជាមួយនឹងរចនាបថលំនៅឋានសម័យទំនើបដែលមានខុនដូ១២អាគារស្មើនឹង ១៣១៩បន្ទប់ អាគារខុនដូប្រភេទស្ទូឌីយ៉ូ ១អគារស្មើនឹង ១៦៣បន្ទប់ ដែលមានកម្ពស់១៣ជាន់  ផ្ទះល្វែង ផ្ទះអាជីវកម្ម វីឡាភ្លោះ ផ្សារទំនើប សារមន្ទីរកីឡា មានចំណតធំទូលាយ ល្អឥតខ្ចោះសម្រាប់ការរស់នៅ និងវិនិយោគនាពេលអនាគត។ លើសពីនេះទៅទៀត ក្រុមហ៊ុនវើលដ៏ប្រ៊ីដគ្រុបដែលធ្លាប់មានបទពិសោធន៍ពេញលេញក្នុងការអភិវឌ្ឍអគារខ្ពស់ទំនើបៗ និង លំនៅឋានដ៏ប្រណីតៗនៅកម្ពុជា នឹងធ្វើការប្តេជ្ញាចិត្តក្នុងការនាំមកនូវបទពិសោធន៍ថ្មីៗ និង ភាពជឿជាក់ក្នុងការរស់នៅរបស់អតិថិជន។ អ្វីដែលគួរឱ្យចាប់អារម្មណ៍នោះ គឺការពន្លឿនការសាងសង់ ដោយផ្តោតជាចម្បងលើគុណភាពសំណង់ និងលក្ខខណ្ឌបង់ប្រាក់ងាយស្រួលសម្រាប់អតិថិជន គឺជាផ្នែកមួយនៃភាពជោគជ័យរបស់គម្រោង“ភូមិកីឡដ្ឋាន វើលដ៍ប្រ៊ីដ” នេះផងដែរ។